Ghar or insan, home and man, insan ka pahla ghar, ghar ka safar

Ghar or insan

Ghar or insan-

Shuruwati samay me ghar or insan yah do bhinna-bhinna bate thi. Us samay insan khane ki talash me janglo me kahi bhi bhatakta firta tha. Use khane ke alava anya koi jarurat mahsus nahi hoti thi. Rat gujarne ke liye vah bade-bade vishalkay pedo ka sahara liya karta tha. Subh hote hi punh khane ki talash me nikal jata. Ham aisa bhi kah skte hai ki, Us wakt ghar or insan ek dusre se anjan the. Samay gujrne ke sath-sath insani dimag ne kamal ki pragati ki. Jaise-jaise uska dimag tez hote gaya, vaise-vaise insan ke jeevan me kamal ka sudhar aya.

Gufa ki khoj

Samay ke sath insan ko gyat hua ki aag, hawa, pani, bijli jaise prakrutik sankato se bachne ke liye gufa ek surakshit sthan hai. Us samay rahne ke liye yah buddhijivi gufa ki khoj karne laga. Yad rahe dosto, Insan se pahle un gufao me anya prani raha karte the. Gufaye un vanya jeevo ka ghar hua karti thi.

Dhire dhire usne apna samuh badha kar apne hathiyaro (chote nukile patthar or sidhi lakdi se banaye bhale) ka upyog kar, anya praniyo se sari gufaye hathiya li. Samay bitne ke sath inasan ka samuh bada hota chala gaya or gufaye choti padne lagi. Samuh ke sadssyo ki badhti sankhya ke karanvash anya sadssyo ko gufaye chod kar dusri gufa ki koj karni padi ya punh khule janglo me niwas karna pada. Kyo ki samuh ke sare sadssyo ko ek gufa me rah pana mushkil ho gaya tha. Isiliye baki sadssy apne liye dusri gufa ki khoj kar waha niwas karne lage. Or is prakar insani samuh ka punh vibhajan ho kar insan sampurn jangal va pradesh me dur tak failne laga. Kintu janglo me gufao ki sankya bahut hi kam hone ke Karan punh insan ke samksh rahne ki samsya nirman hone lagi.

Pahla ghar

Janglo me gufao ki sankya atyant kam hone ke karan dhire-dhire usne pedo ki tahniyo or pattiyo ka upyog kar apne liye choti-choti zopdiya banana bhi sikh liya. Pattiyo or tahnio ko sath bandhe rakhne ke liye insan ne us samay ped ki khal or bel ka upyog kiya hoga. Ji ha vahi insan ne banaya hua pahla ghar tha. Shayd vahi se ghar or insan ki kalpna ne janm liya ho.

Ghar ka safar

Dosto koi nahi janta ki insan ne jo pahla ghar banaya us ghar ka safar itna hasin or sukun bhara hoga. Jab insan ne khud ke rahne layak zopdi bana li tab usne zopdi ke as-pass ki jagah ko saf kiya hoga. Kuch chote pedo ko patthro or apne shikar ke shashtro se hataya hoga. Zopdi hetu khuli jagah banai hogi. Ta ki chote or vishyle jeev jantuo ko zopdi se dur rakha ja sake. Jis pal usne pedo ko patthar or shastro ki sahayta se hataya. Vahi se khudgarj insan ne pedo ki dosti bhula di hogi.

gufa, insan ka pahla ghar,

Shuruwat me ped ka upyog kar ke banai zopdi me ab mitti ka upyog hone laga. Samay ke sath lakdi, mitti, pathhar, chuna aur cement aisa safar karte huye kal ki zopdi aaj majbut ghar ban gai.

Kuch sawal

Kya koi soch bhi sakta tha? Yah ped ki pattiyo se zopdiya banane wala insan bhavishya me cement ki gaganchumbi imarato me rahega.

Koi janta tha? Hare-bhare prakrutik janglo ko tabah kar, insan cement ke janglo me badal dega. Jaha uska janm hua tha vahi jagah ko tahas-nahas kar dega.

Jin pedo ne is nadan se insan ko sahara diya, uski anya praniyose suraksha ki, unhi pedo ko kat kat kar khatm kar dega?

Kya koi janta tha jin vanya jeevo ke sath vo pala badha unke prakrutik ghar nasht kar. Ghar or insan ka rishta kitna majbut hai yah sari duniya ko dikhana chahta hai.

Paryawarn

Bohot dukh ki bat hai jo hamara prakrutik ghar hua karta tha vahi paryawarn me jine ke liye aaj ham paise kharch kar chuttiya manane jate hai.

Pranvayu (oxygen)

Is bat se bhi hame koi khushi nahi ho sakti ki jo shuddh pranvayu (oxygen) hame free me milta tha vah aaj dushit ho gaya hai. Itna nahi aaj usi shuddh pranvayu ko kharidne ke liye asptal me paise dene padte hai.

Paryavarn, prakriti, oxygen, pranvayu, nature,

Shuddh pani

Ajib si bat hai dosto jo pani itna shuddh tha ki insan jangal me kisi bhi nadi nale ya talab ka pani pi sakta tha. Vahi pani aaj insan ne itna dushit kar diya hai ki vah shuddh pani bhi ab use paiso se kharidna pad raha hai.

Vanya jeev

Dharti se insano ne kafi vanya jeev jantuo ka astitv mita diya or mitata chala jar aha hai. Insan jin vanya jeev jantuo ke sath raha karta tha aaj unhe dekhne ke liye bhi insan ko paise kharch karne padte hai.

Utne dur jane ki jarurat nahi, kuch hi samay pahle jo chidiya or kauye hamare sath raha karte the. Aaj vo ham se dur lupt hote ja rahe hai. Aaj jeb dhili kar unki kahaniya padh kar hi hame santusht hona pad raha hai. Kya koi aisa insan hai jo chidiya or kauye fir se hamari duniya punh la skta hai? Bohot thodihi jagah bachi hai jaha inka astitv bacha hai.

Aise kayi udaharan mai apko bata skta hu, or aap log bhi yah bat achi tarah se samaz sakte hai. Ham insan aaj kis vinash ki or badh rahe hai. Ghar or insan ki yah Jodi dikhne or sochne me bohot achi lagti ho, magar is Jodi ke mahavinash ham jald hi dekh sakte hai.

Aaj ham insano ne sab khatm kar diya hai. Aaj insan itne tejise tabahi ki or badh raha hai ham soch bhi nahi sakte. Apne niji swarth ke liye insan ne sare pedo or janglo ka safaya kar diya hai. Uske parinam sare manav jati ko or age anewali kai pidhiyo ko bhugatne honge.

Ek report k anusar har insan ek ped lagata hai to pure 20 sal lag jayenge bigda hua paryavar punh sthapit hone me.

Prakruti ke ishare

Global warming uska ek jita jagta udaharn hamare samne hai. Aise prakruti ke ishare samz kar hame savdhan hona chahiye. Ham insano ko samaz jana chahiye ki ham kya karne ja rahe hai.

Muft me milne wala prakrutik pani ka becha jana, muft me milne wali pranvayu ko becha jana, vanya praniyo ko paise dekar dekh pana, unki kahaniya bas kitabo me padhna in sab sanketo se hame sikh leni chahiye.

Savdhani

In isharo ko samz ke savdhani barat-te huye Badhte huye cement ke janglo ko rokna avashyak hai. Badhte huye jal pradushan ko rokna avashyak hai. Vayu pradushan ko rokna namunkin sa lagne laga hai. Lekin fir bhi ham bas ek ped laga kar ise rokne me khud ki madat kar sakte hai.

Hame samzna hoga ki prakruti nam sunte hi hamara man shanti ka bhav ata hai or man shant ho jata hai, usi prakriti ko ko ham kachare ke dher me tabdil kar rahe hai. Parinam aap sab jante hai.

Insan sochta hai bhagwan aake use bacha lega lekin aisa nahi hai. Ye ped ye jangal, pashu-pakshi, nadi-nale, talab or yah samst prakruti or hamara paryavaran hi hamare bhagwan hai. Agar hamne samay rahte inhe nahi bachaya to ye log hame bachane ke liye jinda nahi rahenge.

Dosto ummid hai aaj ki ghar or insan ki yah post aap ko achi lagi ho. Comment kar ke hame batana na bhule.

Apka din shubh ho “Dhanyawad”

Is post ki pahle ka bhag padhe

2 thoughts on “Ghar or insan”

Leave a Comment

आपका ईमेल पता प्रकाशित नहीं किया जाएगा. आवश्यक फ़ील्ड चिह्नित हैं *